Samband íslenskra sveitarfélaga auglýsir eftir umsóknum í Endurmenntunarsjóð grunnskóla árið 2010. Þeir sem hyggjast standa fyrir endurmenntun fyrir kennara og stjórnendur grunnskóla geta sótt um framlög úr sjóðnum, þar á meðal háskólar, skólaskrifstofur, sveitarfélög, skólar, félög, fyrirtæki og aðrir. Gert er ráð fyrir að námskeiðum verði að fullu lokið eigi síðar en við lok skólaársins 2010-2011. Verði ekki unnt að ljúka námskeiðum innan þeirra tímamarka fellur styrkveiting niður.

Stjórn sjóðsins hefur ákveðið að allt að þriðjungi ráðstöfunarfjár verði úthlutað til verkefna sem tengjast:

• Færni í upplýsingatækni við kennslu
• Námsmatsaðferðum

Umsækjendum er gert að sækja um á rafrænu formi. Í umsóknum skal gefa ítarlegar upplýsingar um hvers konar endurmenntunartilboð umsækjandi hyggst bjóða, m.a. markmið námsins, stað og tíma, áætlaðan fjölda þátttakenda, skipulag kennslu, stjórnun, ábyrgðarmann og annað það sem máli kann að skipta við mat á umsókn. Einnig skal leggja fram sundurliðaða kostnaðaráætlun. Þær umsóknir einar koma til álita sem sýna fram á að endurmenntunartilboðið mæti þörfum grunnskólans, sé byggt á skólastefnu, aðalnámsskrá, fagmennsku og gæðum. Sjóðurinn veitir ekki fé til ferða og uppihalds.

Þegar fyrir liggur ákvörðun um hverjir fá styrk verður gerður sérstakur samningur um hvert endurmenntunarverkefni.

Umsóknarfrestur er til 22. febrúar 2010. Umsóknum skal skilað inn á rafrænu formi.

Nánari upplýsingar um Endurmenntunarsjóð grunnskóla veitir Guðfinna Harðardóttir í síma 515 4900 eða í tölvupósti á gudfinna.hardardottir@samband.is.