„Umhyggja í leikskólastarfi“

Farið er stuttlega yfir kenningar um umhyggju í skólastarfi s.s. kenningar Nel Noddings, Beritar Bae, R. Lee Smith og Valborgar Sigurðardóttur.  Þá verður fjallað ýtarlega um hvar og hvernig við notum umhyggju í starfi með börnum í leikskóla.

„Frjálsi leikurinn, kenningar, mikilvægi og viðhorf kennara“

Fjallað um helstu kenningar um leik, hugmyndir þeirra Birgittu Knudsdotter Olofsson, Berit Bae og Valborgar Sigurðardóttur.  Um mikilvægi leiks í þroska barna og tegundir leikja frá 0-6 ára.  Þá er farið í  hvað hefur áhrif á leik barna í leikskólanum og einnig um mikilvægi þess að hafa gott leikefni sem hæfir aldri hvers og eins.  Rætt verður um mikilvægi þess að starfsfólk hafi innsýn í þróun leikja, skilning á leik barna og samskipti barna í leik.  Einnig verður fjallað um þátttöku starfsfólks í leiknum – vinnuna á gólfinu og hvernig við getum hjálpað barni inn í leik með öðrum. 

Námskeiðið er í formi fyrirlestra, verkefna og skoðuð eru myndbönd sem sýna leik barna og afskipti fullorðinna í leiknum. 

„Samskipti í leikskóla“

Berit Bae er norskur lektor í uppeldisfræði og hefur gert rannsóknir á samskiptum fullorðinna og barna í leikskólum.  Hún kemst að því í rannsókninni að viðhorf, viðmót og öll framkoma starfsmanna gagnvart börnum og starfsfélögum skapi forsendur fyrir þróunarmöguleikum beggja þessara aðila.  

Fjallað verður um þau atriði sem Bae segir að skapi grundvallarforsendur fyrir því að börn og fullorðnir geti þróað sig í leik og starfi, en þau eru; nálægð, viðurkenning, skilgreiningarvald, ígrundun, staðfesting og tengsl við hvert barn.

”Litlu börnin í leikskólanum”

Fjallað er um breytingar í umhverfi leikskólanna varðandi litlu börnin, þau eru nú mun fleiri, í lengri vistun, þetta kallar á aukna þekkingu. Fjallað verður um viðhorf starfsfólks til litlu barnanna og hvernig við notum umhyggju á faglegan hátt í starfi með ungum börnum.  Þá verður farið yfir hvaða markmið er raunhæft að setja  í vinnu á yngstu deild og hvernig við vinnum námskrá fyrir 0-3 ára börn þar sem ekki er hægt að notast við sama skipulag á deild fyrir 0-3 ára og 4-6 ára, uppfylling á grunnþörfunum tekur meiri tíma. Þá er fjallað um grunnþarfir og nauðsyn þess að gefa þeim góðan tíma, varðandi svefn, matartíma o.s.frv.  Farið verður yfir hvað þarf að þjálfa hjá ungum börnum og hvers vegna, hvaða efni er gott að notast við.  

"Tákn með tali" 
Fjallað er lauslega um hugmyndafræði að baki tákna með tali og eðli táknanna.  Innlögn tákna og æfingar.  Þátttakendur fá/finna sér táknnöfn.  Innihald námskeiðanna er mismunandi eftir því hvort skólinn er að taka inn tákn með tali í fyrsta skipti eða hvort um er að ræða viðbótarnámskeið. 

„Boardmaker Plus“

Þátttakendur læra að nota forritið Boardmaker Plus.  Myndrænt skipulag og sjónrænar stundaskrár eru viðurkenndar aðferðir til að auka sjálfstæði og félagslega færni nemenda.  Sjónrænt kerfi er sett upp í öllum þeim aðstæðum þar sem nemandinn skilur ekki, sýnir kvíða, óöryggi eða ósjálfstæði.  Sé það ger veit nemandinn nákvæmlega hvað hann á að gera, hversu lengi og hvað tekur við að því loknu.  Þannig drögum við úr munnlegum fyrirmælum og aukum sjálfstæði nemandans. 

Á námskeiðinu er þátttakendum kennt að setja upp  myndrænt dagskipulag, stundaskrár, mánaðarskema og hvernig brjóta má niður kennslustundir í myndrænt skipulag.  Þátttakendur þurfa að hafa fartölvu meðferðis og forritið sjálft, sé þess kostur.

„Gæði í leikskólastarfi“

Fjöldi rannsókna hefur verið gerður á til að meta gæði í skólastarfi og til að finna hvað einkennir þá skóla sem teljast til „gæðaskóla“.  Flestar kenningar komast að þeirri niðurstöðu að það séu skólar sem hafa fagmenntaða kennara, fámenna barnahópa, lykilpersónu fyrir hvert barn, jákvæða umönnun og stöðugleika í sarfsmannahaldi.  Á námskeiðinu er fjallað um þessa þætti og hvernig skólar geta bætt gæði í skólastarfi, lið fyrir lið.

 

„Einu sinni voru tveir tómatar“ - um húmor í leikskólastarfi.

Fjallað er um rannsóknir sem gerðar hafa verið á húmor í skólastarfi og á þróun húmors hjá börnum.  Í erindinu er sýnt fram á að þróun húmors helst í hendur við félagsþroska og félagsfærni hjá börnum.

Þeir sem vinna í leikskóla geta verið að með börnunum í allt að 8 klst. á dag.   Það er því eins gott að ákveða strax að ætla einfaldlega að njóta þess.  Flestir starfsmenn eru glaðir og kátir og gefa endalaust af sér til barna og samstarfsfólks og snúa hlutunum upp í grín ef illa gengur.  Aðrir eru stundum  fúlir, þreyttir, argir og sjá ekki gleðina við að vinna með börnum og láta ergelsi í ljós.

Fjallað verður um það hvernig starfsfólk leikskólans mætir húmor barnanna á mismunandi hátt, t.d. þegar góður brandari ætlar allt um koll að keyra.  Fjallað verður um hvernig börn nota húmor, tegundir húmors og hvort og þá hvernig starfsfólk í leikskóla getur notað húmorinn sem tæki til að bæta skólastarfið. 

Til baka